Hieronymus, De situ et nominibus locorum Hebraicorum, LIBER., 17. DE IUDICUM LIBRO.
| 1 | Cethron, in tribu Zabulon, in qua pristini remansere cultores. |
| 2 | Carcar, ubi filii erant Zebee et Salmana, quos interfecit Gedeon: et est usque hodie castellum cognomento Carcaria, unius diei itinere ab urbe Petra distans. |
| 3 | Camon, civitas Iair, in qua et sepultus est, cum primum iudicasset populum Israel. |
| 4 | Appellatur autem hodieque vicus Cimona, in campo latissimo sex millibus a Legione ad septentrionalem plagam pergentibus Ptolemaidem. |
| 5 | Cison, torrens, iuxta montem Thabor: ubi contra Sisaram dimicatum est. |
| 6 | Cadomi, torrens, iuxta quem Debbora bellum gessit. |
| 7 | Coelas Titanorum (id est vallis Gigantum), adversus quos praeliatus est David. |
| 8 | Clauthmon, id est, fletuum locus, a planctu nomen accipiens. |