Hieronymus, De situ et nominibus locorum Hebraicorum, LIBER., 15. DE PENTATEUCHO.
| 1 | Carnaim Astaroth, Carnaim nunc vicus est grandis in angulo Batanaeae et appellatur Carnaea trans fluenta Iordanis: traduntque ibi fuisse domum Iob. |
| 2 | Sed et supra meminimus Carnaeae viculi, in nono ab Aelia milliario. |
| 3 | Cades, ubi fons iudicii: est et Cadesbarne in deserto, quae coniungitur civitati Petrae in Arabia: ibi occubuit Maria: 183 et Moses, rupe percussa, aquam sitienti populo dedit. |
| 4 | Monstratur ibidem usque in praesentem diem sepulcrum Mariae; sed et principes Amalec ibi a Chodorlagomer caesi sunt. |
| 5 | Cene, regio principum Idumaeorum. |
| 6 | Cariathaim, civitas quam exstruxerunt filii Ruben. |
| 7 | Nunc autem est vicus Christianis omnibus florens, iuxta Medaban urbem Arabiae, et appellatur Coroiatha in decimo milliario supradictae urbis, contra occidentalem plagam, vicinus eius loci, qui appellatur Baare. |
| 8 | Cariatharbee (id est villula quatuor), quae et Chebron, de qua iam supra diximus. |
| 9 | Canath, vicus Arabiae, qui nunc Canatha dicitur: quem cum cepisset Nabau, appellavit Naboth. |
| 10 | Fuit autem in tribu Manasse in regione Trachonitidi iuxta Bostran. |
| 11 | Cata ta chrysea (id est ad aurea). |
| 12 | Sunt autem montes auri fertiles in deserto, procul undecim mansionibus a Choreb, iuxta quos Moses Deuteronomium scripsisse perhibetur. |
| 13 | Sed et metallo aeris Fano (quod nostro tempore corruit), montes venarum auri plenos olim fuisse vicinos aestimant Cademoth, desertum, ex quo loco misit legatos Moses ad Seon (regem Amorrhaeorum). |
| 14 | Cariath, vicus qui sub Gaba metropoli fuit. |
| 15 | Cedes, civitas quam cepit Iesus, rege ipsius interfecto. |
| 16 | Est autem in sorte tribus Iudae. |
| 17 | Cademoth, altera civitas filiorum Ruben. |
| 18 | Cedson, in tribu Ruben, urbs separata Levitis. |