monumenta.ch > Gregorius Turonensis > 19.
Gregorius Turonensis, Libri octo miraculorum, DE VIRTUTIBUS SANCTI MARTINI EPISCOPI, Lib. I, , 18. <<<     >>> 20.

Gregorius Turonensis, Libri octo miraculorum, DE VIRTUTIBUS SANCTI MARTINI EPISCOPI,..., 19.

1 Nec hoc silebo, quid caecitati contulerit, cum ad beatum sepulchrum devota mulier expetisset.2 Quaedam de Turonico territurio femina Bella nomine, amisso oculorum lumine, graviter laborabat.3 Et cum die noctuque incessabilibus doloribus urgueretur, dicit suis: 'Si ad basilicam domni Martini ducta fuissem, continuo recepissem salutem.4 Confido etenim, quod possit oculis meis lumen infundere, qui potuit pauperis lepram osculo libante sanare'.5 Dehinc, adminiculo deducente, venit ad sanctum locum, ibique ieiuniis et orationibus crebris insistens, visum, quem amiserat, recipere meruit.6 Et ita sanata est, ut, quae caeca venerat, alio perducente, caecis affatim dux futura regressa sit.7 Quae postea virum accipiens et filios generans, recuperatori gratias rependit incolomes.Gregorius Turonensis HOME
bbb199.51r