Gregorius Turonensis, Libri octo miraculorum, p3, p6

monumenta.ch > Gregorius Turonensis > 4.
Gregorius Turonensis, Libri octo miraculorum, DE VIRTUTIBUS SANCTI MARTINI EPISCOPI, Lib. I, , 3. <<< >>> 5.

Gregorius Turonensis, Libri octo miraculorum, DE VIRTUTIBUS SANCTI MARTINI EPISCOPI,..., 4.

1 Beatus autem Severinus Colonensis civitatis episcopus, vir honestae vitae et per cuncta laudabilis, dum die dominico loca sancta ex consuetudine cum suis clericis circuiret, illa hora qua vir beatus obiit audivit chorum canentium in sublimi.2 Vocatoque archidiacono, interrogat, si aures eius percuterent voces, quas ille adtentus audiret.3 Respondit: 'Nequaquam'.4 Tunc ille: 'Diligenter', inquid, 'ausculta'.5 Archidiaconus autem coepit sursum collum extendere, aures erigere et super summis articulis, baculo sustentante, stare.6 Sed credo, eum non fuisse aequalis meriti, a quo haec non merebantur audiri.7 Tunc prostrati terrae ipse pariter et beatus episcopus, Dominum deprecantur, ut hoc ei divina pietas audire permitteret.8 Erectis autem, rursum interrogat senes: 'Quid audis?' Qui ait: 'Voces psallentium tamquam in caelo audio, sed quid sit prorsus ignoro'.9 Cui ille: 'Ego tibi quid sit narrabo.10 Domnus meus Martinus episcopus migravit ex hoc mundo, et nunc angeli canendo eum deferunt in excelsum.11 Et ut parumper mora esset, ut haec audirentur, diabolus eum cum iniquis angelis retenere temptavit, nihilque suum in eundem repperiens, confusus abscessit.12 Quid ergo de nobis peccatoribus erit, si tantum sacerdotem voluit para iniqua nocere?' Haec sacerdote loquente, notatum tempus, archidiaconus Turonus misit velociter qui haec diligenter inquireret.13 Qui veniens, eum diem horamque manifestissime cognovit transisse beatum virum, quo sanctus Severinus audivit psallentium chorum.14 Sed si ad Severi recurramus historiam, ipsa hora eum sibi scripsit cum libro vitae suae fuisse revelatum.