Gregorius Turonensis, Libri miraculorum, 2, 14

monumenta.ch > Gregorius Turonensis > 14
Gregorius Turonensis, Libri miraculorum, 2, XIII. De his qui Theoderici regis tempore basilicam irruperunt. <<< >>> XV. De Pastoris malitia.

Gregorius Turonensis, Libri miraculorum, 2, CAPUT XIV. De Sigivaldo pervasore.

1 Tunc Sigivaldus cum rege praepotens cum omni familia sua in Arverna regione ex regis iussu migravit: ubi dum multorum res iniuste competeret, villam quamdam quam gloriosae memoriae Tetradius, episcopus Biturigensis, basilicae sancti Iuliani reliquerat, sub specie obumbratae commutationis, avidus pervasit: sed mense tertio postquam aggressus est, correptus a febre, et sine sensu effectus, declinavit caput ad lectulum.2 Cuius uxor dum de hoc exitu moesta penderet, a quodam sacerdote commonita est, ut eum si videre vellet incolumem, auferret a villa.3 At illa haec audiens, praeparatis carrucis, compositoque plaustro, quo eum eveheret, mox ut praedium sunt egressi, protinus divina sunt pariter gratia munerati.4 Nam iste sospitate [Leg. sospitatem], illa meruit ex huius incolumitate laetitiam.5 Ferunt etiam in oratorium praedii illius sanctum Iulianum martyrem cum Tetradio episcopo colloquentem cuidam religioso revelatum fuisse, promittentem se episcopo villam, quam pro animae suae remedio sibi reliquerat, recepturum.6 Sed et habitum beati Martyris in eodem modo esse, ut quondam paralytica exposuerat (Supra cap. 9), referebat.