Gregorius Turonensis, Libri miraculorum, 2, 10

monumenta.ch > Gregorius Turonensis > 10
Gregorius Turonensis, Libri miraculorum, 2, IX. De Fedamia paralytica. <<< >>> XI. De contracto, qui die Dominica boves iunxit.

Gregorius Turonensis, Libri miraculorum, 2, CAPUT X. De eo qui percussorem suum de basilica conabatur extrahere.

1 Quidam dum in seditione quam commoverat oculum amisisset, hominem qui ictum intulerat de basilica conabatur extrahere: quod dum agit, non modo amissi oculi non recipit lumen, verumetiam sentit alium, quem sanum habuerat, obcaecari.2 Porro cum peccata sua confiteretur, dicens: Merito mihi evenit iudicium sine misericordia, qui non feci misericordiam, prostratus coram sancto sepulcro cum populo, qui tunc ad festivitatem advenerat, indulgens laedenti, et visum recepit et gratiam.3 Sicque factum est, ut is qui Sancti auxilium expetierat tutaretur, ille vero qui non credebat argueretur, et sic uterque laetus emendatusque discessit.