monumenta.ch > Gregorius Turonensis > 11 > 74 > 29 > 98 > 27 > 44 > 86 > 23 > 81a > 83 > 32 > 59 > 25 > 39
Gregorius Turonensis, Libri miraculorum, 1, XXXVIII. De Chrysantho martyre. <<<     >>> XL. De Ioanne episcopo et martyre.

Gregorius Turonensis, Libri miraculorum, 1, CAPUT XXXIX. De Pancratio martyre.

1 Est etiam haud procul ab huius urbis muro et Pancratius martyr, valde in periuris ultor (An. 304, 12 Maii).2 Ad cuius sepulcrum, si cuiusquam mens insana iuramentum inane proferre voluerit, prius quam sepulcrum eius adeat, hoc est antequam usque ad cancellos qui sub arcu habentur, ubi clericorum psallentium stare mos est, accedat, statim aut arripitur a daemone, aut cadens in pavimento amittit [Bal. emittit] spiritum.3 Ex hoc enim quisque fidem cuiuscunque rei ab alio voluerit elicere, ut verum cognoscat, non aliter nisi ad huius basilicam destinat.4 Nam ferunt plerosque iuxta basilicas apostolorum sive aliorum martyrum commanentes, non alibi pro hac necessitate nisi templum expetere beati Pancratii, ut eius severitatis censura publice discernente, aut veritatem audientes credant, aut pro fallacia iudicium martyris beati experiantur.Gregorius Turonensis HOME
bbb199.14r bnf1712.20 bnf2204.29 bnf9733.19