monumenta.ch > Gregorius Turonensis > XIII.
Gregorius Turonensis, Historia Francorum, LIBER NONUS., , XII. <<<     >>> XIV.

Gregorius Turonensis, Historia Francorum, LIBER NONUS., XIII.

1 Guntchramnus vero Baddonem, quem pro crimine maiestatis superius vinctum diximus (Lib. VIII, cap. 44), in praesentiam suam venire iussit; et transmittens usque Parisios, ait: Si eum cum idoneis hominibus Fredegundis ab hac actione qua impetitur, immunem fecerit, abscedat liber, et quo voluerit eat.2 Sed veniens Parisios, nullus de parte memoratae mulieris adfuit, qui eum idoneum reddere posset.3 Tunc vinctus et catenis oneratus, sub ardua custodia ad urbem Cabillonensem reductus est.4 Sed postea intercurrentibus nuntiis, et praesertim Leudovaldo Baiocassino pontifice, dimissus ad propria rediit.5 Graviter tunc morbus dysentericus apud Mettensem saeviebat urbem.6 His diebus nos dum ad occursum regis properaremus, Wiliulfum civem Pictavum, plenum febre, hoc morbo laborantem in via offendimus, id est ad Rhemensem urbem: de qua profectus valde exinanitus, cum ad urbem Parisiacam cum filio uxoris suae venisset, apud villam Rigoialensem facto testamento defunctus est; puer vero, qui et ipse ab hoc languore tenebatur, obiit; et sic pariter in urbis Pictavae delati terminum, tumulati sunt.7 Uxor quoque ipsius Wiliulfi tertio copulatur viro, filio scilicet Beppoleni ducis, qui et ipse duas iam, ut celebre fertur, uxores vivas reliquerat.8 Erat enim levis atque luxuriosus, et dum nimio ardore fornicationis arctaretur, ac relicta coniuge cum famulabus accubaret, exhorrens legitimum connubium, aliud expetebat: sic et secundae fecit et huic, cui tertio copulatus est, ignorans quod corruptio incorruptionem non possidebit (I Cor. XV, 50).Gregorius Turonensis HOME
bnf5921.125 hab1092.50