monumenta.ch > Gregorius Turonensis > VII.
Gregorius Turonensis, Historia Francorum, LIBER NONUS., , VI. <<<     >>> VIII.

Gregorius Turonensis, Historia Francorum, LIBER NONUS., VII.

1 Ennodius cum ducatum urbium Turonicae atque Pictavae administraret, adhuc et Vici Iuliensis atque Benarnae urbium principatum accipit.2 Sed euntibus comitibus Turonicae atque Pictavae urbis ad regem Childebertum, obtinuerunt eum a se removeri.3 Ille vero ubi se remotum de his sensit, ad civitates superius memoratas properat; sed dum in illis commoraretur, mandatum accepit, ut se ab eisdem removeret, et sic accepto otio, ad domum suam reversus, privati operis curam gerit.4 Vascones vero de montibus prorumpentes in plana descendunt, vineas, agrosque depopulantes, domos tradentes incendio, nonnullos abducentes captivos cum pecoribus, contra quos saepius Austroualdus dux processit, sed parvam ultionem exegit [Al. exercuit] ab eis.5 Gotthi vero propter superioris anni devastationem, quam in Septimania regis Guntchramni exercitus fecit, in Arelatensem Provinciam proruperunt, egeruntque praedas, et captivos abduxerunt usque ad decimum ab urbe milliarium.6 Unum etiam castrum, Ugernum nomine, cum rebus atque habitatoribus desolantes, nullo resistente regressi sunt.Gregorius Turonensis HOME
bnf5921.123 hab1092.46