Gregorius Turonensis, Historia Francorum, p2, p35

monumenta.ch > Gregorius Turonensis > XXXIII.
Gregorius Turonensis, Historia Francorum, LIBER PRIMUS., , XXXII. <<< >>> XXXIV.

Gregorius Turonensis, Historia Francorum, LIBER PRIMUS., XXXIII.

1 Sub Diocletiano, qui tricesimo tertio loco Romanum rexit imperium, gravis contra Christianos per annos quatuor persecutio exagitata est: ita ut quadam vice in ipso sacratissimo die Paschae, magni Christianorum populi ob veri Dei cultum interficerentur.2 Eo tempore, Quirinus Sisciensis Ecclesiae sacerdos, gloriosum pro Christi nomine martyrium tulit; quem ligato ad collum molari saxo, in fluminis gurgitem saevitia impulit paganorum.3 Igitur cum cecidisset in gurgitem, diu super aquas divina virtute ferebatur; nec sorbebant aquae, quem pondus criminis non premebat.4 Quod factum admirans multitudo populi circumstantis, despecto furore gentilium, ad liberandum properant sacerdotem.5 Haec ille cernens, non passus est se a martyrio subtrahi, sed erectis ad coelum oculis, ait: Iesu Domine, qui gloriosus resides ad dexteram Patris, ne patiaris me ab hoc stadio removeri; sed suscipiens animam meam, coniungere me tuis martyribus in requie sempiterna dignare.6 His dictis, reddidit spiritum.7 Cuius corpus a Christianis susceptum venerabiliter sepulturae mandatum est.