Gregorius Turonensis, Historia Francorum, p2, p33

monumenta.ch > Gregorius Turonensis > XXXI.
Gregorius Turonensis, Historia Francorum, LIBER PRIMUS., , XXX. <<< >>> XXXII.

Gregorius Turonensis, Historia Francorum, LIBER PRIMUS., XXXI.

1 Iuxta hanc urbem Liminius, Antolianusque martyres requiescunt.2 Ibi Cassus ac Victorinus in dilectione Christi fraterno affectu sociati, per effusionem cruoris proprii, coelorum regna pariter sunt adepti.3 Nam refert antiquitas, Victorinum servum fuisse ante dicti templi sacerdotis.4 Qui dum plerumque vicum, quem Christianorum vocant, ad persequendos Christianos adit, Cassium reperit Christianum: cuius praedicationibus atque miraculis motus, credit Christo, relictisque fanaticis sordibus ac baptismo consecratus, magnus in virtutum operatione enituit.5 Nec multo post per martyrium, ut diximus, in terris sociati, ad coelestia pariter regna migraverunt.