Gregorius Turonensis, De miraculis S. Martini, 3, 41

monumenta.ch > Gregorius Turonensis > 41
Gregorius Turonensis, De miraculis S. Martini, 3, XL. De paralytico sanato. <<< >>> XLII. De libro Vitae eius inter flammas salvato.

Gregorius Turonensis, De miraculis S. Martini, 3, CAPUT XLI. De catenis super puellam confractis.

1 His diebus puella quaedam, iam ex libertis parentibus procreata, a filiis patroni, confracta libertate, ad iugum servitutis addicitur: unde factum est ut illa non acquiescente iniustis dominis quidquam operis exercere, catenis et compedibus vinciretur.2 In qua custodia dum aliis beatam festivitatem expetentibus resideret, flens et eiulans, cur non interesset beatae festivatati, subito trabs in qua pedes eius arctati erant scinditur; et haec quasi iam libera, nexa quidem catenis, elapsa beatam basilicam expetivit.3 Verum ubi primum pedes eius sacra limina contigerunt, statim confractae catenae ceciderunt a collo eius; et sic incolumitate pariter libertateque donata est.