Gregorius Turonensis, De miraculis S. Martini, 2, 51

monumenta.ch > Gregorius Turonensis > 51
Gregorius Turonensis, De miraculis S. Martini, 2, L. De caeco illuminato. <<< >>> LII. De alio ab humore gravi sanato.

Gregorius Turonensis, De miraculis S. Martini, 2, CAPUT LI. De dysentericis.

1 Cum autem morbus ille dysentericus cum occultis pustulis multas attereret civitates, ac inter reliqua loca urbs Turonica gravius laboraret, multi abraso a beato tumulo pulvere et hausto, sanabantur.2 Plerique, de oleo quod inibi habetur delibuti, liberabantur; fuitque nonnullis remedium aqua illa unde sepulcrum ablutum est ante Pascha.3 Igitur, cum multis multa tribuerentur beneficia, vidi unum in desperatione a dysenteria iacentem, huncque ad basilicam ductum, aliis vigilias celebrantibus, noctem inquietam duxisset; diluculo vero accedens ad tumulum, potato cum vino pulvere, sanus rediit e sepulcro.