Gregorius Turonensis, De gloria beatorum confessorum, 56

monumenta.ch > Gregorius Turonensis > 56
Gregorius Turonensis, De gloria beatorum confessorum, LV. De Melanio Rhedonensi episcopo. <<< >>> LVII. De Martino abbate Santonicorum.

Gregorius Turonensis, De gloria beatorum confessorum, CAPUT LVI. De Victorio Cenomanorum episcopo.

1 Victorius Cenomanorum episcopus, magnis se virtutibus saepius declaravit (An. 490, 1 Sept.).2 Nam ferunt quadam vice, dum civitas ipsa cremaretur incendio, et validis globis flammae huc illucque impellente vento propellerentur, hic quasi pastor bonus non perferens ecclesiasticas caulas ab insidiis Satanae devastari, obviam se turbini obtulit, elevataque manu, facto signo crucis e contra, illico omne cessavit incendium, liberataque civitas gratias Pastori retulit, eo quod non permiserit res suas ab imminenti igne vorari.3 Et ad huius sepulcrum saepius infirmi sanantur.