Gregorius Turonensis, De gloria beatorum confessorum, 53

monumenta.ch > Gregorius Turonensis > 53
Gregorius Turonensis, De gloria beatorum confessorum, LII. De sepulcris quae elevantur. <<< >>> LIV. De Lupiano confessore.

Gregorius Turonensis, De gloria beatorum confessorum, CAPUT LIII. De sepulcro Thaumasti episcopi.

1 Thaumastus quoque, iuxta expositionem nominis sui, admirabilis sanctitate, Momociacensis urbis fuisse fertur episcopus: de qua urbe nescio qua causa demotus, Pictavum oppidum petiit, ibique praesentem vitam, in bona perdurans confessione, finivit (An . . . 1 Ian.).2 Cui quae sit merces in coelo, ad eius ostenditur tumulum; eumque inhabitare paradisum prodit virtus egrediens de sepulcro: illudque in eo veraciter ostenditur, quod Dominus Iesus Christus in Evangelio Marthae dicit: Qui credit in me, etiam si moriatur, vivit: et omnis qui vivit et credit in me, non morietur in aeternum (Ioan. XIII, 25, 26).3 Hic ergo super terram sepulcrum habet ante ipsum atrium beati Hilarii.4 De quo tumulo erasus a multis pulvis, et haustus, ita dolori dentium febriumque medetur, ut qui hauserit, miretur effectum.5 Nam ita haec benedictio assidue expetitur, ut iam in uno loco sarcophagus appareat transforatus.