Gregorius Turonensis, De gloria beatorum confessorum, 14

monumenta.ch > Gregorius Turonensis > 14
Gregorius Turonensis, De gloria beatorum confessorum, XIII. De haeretico qui hominem illuminare voluit, sed excaecavit. <<< >>> XV. De Venantio abbate.

Gregorius Turonensis, De gloria beatorum confessorum, CAPUT XIV. De altercatione haeretici cum catholico.

1 Retulit alius vir fidelis spectasse se Christianum cum haeretico pro fide nostra certantem.2 Altercantibusque diu de divinis Scripturis, cum flecti non posset haereticus, ut agnosceret veritatem, ait: Si nostrae religionis, si Scripturarum sacrarum testimonia te ad credendum minime movent, vel virtutem individuae Trinitatis miraculis experire.3 Est digito meo annulus aureus: ego eum in ignem iacio, tu candentem collige.4 Proiectumque inter prunas annulum, ita igniri permisit, ut eis similis cerneretur.5 Conversusque ad haereticum ait: Si vera est prosecutio tua, sume eum ab igne.6 Illo autem resistente, ait vir: Immensa Trinitas Deus, si aliquid indignum te credo, ostende.7 Certe si recta est fides mea, nihil mihi praevaleant haec incendia saeva.8 Et ablatum ab igne annulum diutissime palma sustinuit, et nihil est nocitus: sed magis confuso haeretico, catholicos reliquos fervore suae fidei roboravit.9 Hactenus hinc.