Gellius, Noctes Atticae, 13, 4

monumenta.ch > Gellius > 1 > 6 > 6 > 20 > 9 > 8 > 4
Gellius, Noctes Atticae, 13, III An vocabula haec 'necessitudo' et 'necessitas' differenti significatione sint. <<< >>> V De Aristotele et Theophrasto et Menedemo philosophis; deque eleganti verecundia Aristotelis successorem diatribae suae eligentis.

Gellius, Noctes Atticae, 13, Caput IV Descripta Alexandri * * *

1 In plerisque monumentis rerum ab Alexandro gestarum et paulo ante in libro M. Varronis, qui inscriptus est Orestes vel de insania, Olympiadem Philippi uxorem festivissime rescripsisse legimus Alexandro filio. 2 Nam cum is ad matrem ita scripsisset: 'Rex Alexander Iovis Hammonis filius Olympiadi matri salutem dicit', Olympias ei rescripsit ad hanc sententiam: 'Amabo', inquit 'mi fili, quiescas neque deferas me neque criminere adversum Iunonem; malum mihi prorsum illa magnum dabit, cum tu me litteris tuis paelicem esse illi confiteris.' 3 Ea mulieris scitae atque prudentis erga ferocem filium comitas sensim et comiter admonuisse eum visa est deponendam esse opinionem vanam, quam ille ingentibus victoriis et adulantium blandimentis et rebus supra fidem prosperis inbiberat, genitum esse sese de Iove.