| 1 | Ut omissa superius paulisper repetamus, quae sint universales sex synodi, quas totus Oriens recipit et concelebrat, qui catholicam fidem sana mente retinent, ostendamus. Prima enim universalis synodus in Nicaea congregata est contra Arium, CCCXVIII Patrum, temporibus Iulii papae sub Constantino principe. Secunda in Constantinopoli, CL Patrum, contra Macedonium et Eudoxium, temporibus Damasi papae et Gratiani principis, quando Nectarius eidem urbi est ordinatus episcopus. |
| 2 | Tertia in Epheso, CC Patrum, contra Nestorium Augustae urbis episcopum, sub Theodosio Magno principe, et papa Celestino. Quarta in Chalcedone, Patrum DCXXX, sub Leone papa, temporibus Marciani principis, contra Euticen, nefandissimorum praesulem monachorum. Quinta item in Constantinopoli, temporibus Vigilii papae sub Iustiniano principe, contra Theodorum et omnes haereticos. Sexta synodus universalis Constantinopoli celebrata, et Graeco sermone conscripta, temporibus papae Agathontis, exsequente ac residente piissimo principe Constantino intra palatium suum, simulque legatis apostolicae sedis et episcopis CL residentibus. Igitur a Nativitate Domini Iesu Christi ob amorem dominae meae Augustae Iudith, aggressus sum opus quod usque ad Gregorii eximii doctoris obitum perduxi. De gestis etiam Bonifacii papae quaedam deinceps praelibando perstrinxi, Romanorum iudicibus et Gothis ab Italia et Galliis depulsis, his Francis et Longobardis succedentibus in regnis. |