| 1 | Qua tempestate Didymus Alexandrinus, captus a parva aetate oculis, et ob id elementorum quoque ignarus, tantum miraculum suis omnibus praebuit, ut Dialecticam quoque et Geometriam quae vel maxime visu indigent, usque ad perfectum didicerit. Hic plurima nobiliaque scripsit, commentarios in Psalmos omnes, commentarios in Evangelium Matthaei, et in Ioannis, et de dogmatibus, et contra Arianos duos libros, et de Spiritu sancto librum unum, quem Hieronymus in Latinum vertit, et in Isaiam decem et octo commentarios, et in Osee commentariorum libros tres, et in Zachariam prophetam libros quinque, et commentarios in Iob et infinita alia, quae digerere proprii iudicii est. |
| 2 | Effrem Edissenae Ecclesiae diaconus multa Syro sermone composuit opuscula, et ad tantam venit claritatem, ut post lectionem Scripturarum divinarum, publice in Ecclesiis quibusdam eius scripta recitarentur. Edidit de Spiritu sancto Graecum volumen, quod quidam de Syriaca lingua verterat, ex quo acumen sublimis ingenii eius etiam in translatione manifestatur. Discessit sub Valente principe. |
| 3 | Igitur sub Valente principe tanta est orta tempestas Constantinopoli, ut mirae magnitudinis decidentes, in modum lapidum, grandines multos hominum interfecerint. Fitque evidens indignatio Domini omnibus propter exsilia et persecutiones servorum Dei ab imperatore et Arianis exactas. Quibus diebus Melania nobilissima mulierum Romanarum, et Marcellini quondam consulis filia, unico praetore tunc Urbano filio derelicto Hierosolymam navigavit: ubi tanto virtutum praecipueque humilitatis miraculo fuit, ut Teclae nomen acceperit. |