monumenta.ch > Dicuil > 2
Dicuil, Mensura, 1, I <<<     >>> III

Dicuil, Mensura, 1, II

1 Gallia Comata cum insulis Britannicis finitur ab Oriente, flumine Rheno; ab Occidente, Pyrenaeo; a Septentrione, Oceano mari; a Meridie, Rhodano et montis Cebennicis. Longitudine DCCCCXXVIII millia, latitudine CCCLXIII millia. Iuxta Plinium Secundum in quarto libro [Plin. nat. hist. 4, 105]: in longitudinem DCCCCXX millia, in latitudinem CCCVIII millia. 2 Provincia Narbonensis finitur ab Oriente, Alpibus; ab Occidente, saltu Pyrenaeo; a Septentrione, finibus Viennensium et montibus Cebennicis; a Meridie, mari Gallico. Longitudo millia pass. CCCXXXIV, latitudo CLXXXVIIII, iuxta Plinium Secundum in eodem [Plin. nat. hist. 3, 37]: longitudinem provinciae Narbonensis CCCLXX millia, Agrippa tradidit; latitudinem CCCXLVIII millia. Dicuil HOME