monumenta.ch > Cicero > Epistula 1 > Epistula 6 > Epistula 6 > Epistula 3
Cicero, Epistulae, Ad familiares, Liber 16, Epistula 2 <<<     >>> Epistula 4

Cicero, Ad familiares, 16, Epistula 3

0 Scr. Alyziae a. d. viii Id. Nov. a. 704 (50). TULLIUS ET CICERO TIRONI SUO S. D. ET Q. PATER ET FILIUS.1 nos apud Alyziam, ex quo loco tibi litteras ante dederamus, unum diem commorati sumus, quod Quintus nos consecutus non erat. is dies fuit non. Nov. Inde ante lucem proficiscentes ante diem viii Idus Nov. has litteras dedimus. tu si nos omnis amas et praecipue me, magistrum tuum, confirma te. 2 ego valde suspenso animo exspecto primum te scilicet, deinde Marionem cum tuis litteris. omnes cupimus, ego in primis, quam primum te videre sed, mi Tiro, valentem. qua re nihil properaris; satis cito te videro, si valebis. utilitatibus tuis possum carere; te valere tua causa primum volo, tum mea, mi Tiro. vale.
Cicero HOME

bav598.227 bsb125735.225 uldBPL49.190

© 2006 - 2025 Monumenta Informatik