Cicero, Epistulae, Ad familiares, Liber 06, Epistula 17

monumenta.ch > Cicero > Epistula 5b > Epistula 17
Cicero, Epistulae, Ad familiares, Liber 6, Epistula 16 <<< >>> Epistula 18

Cicero, Ad familiares, 6, Epistula 17

0 Scr. in Latio med. m. Apr. a. 720 (44). CICERO BITHYNICO.1 Cum ceterarum rerum causa cupio esse aliquando rem publicam constitutam tum velim mihi credas accedere, id etiam quo magis expetam, promissum tuum, quo in litteris uteris; 2 scribis enim, si ita sit, te mecum esse victurum. gratissima mihi tua voluntas est facisque nihil alienum necessitudine nostra iudiciisque patris tui de me, summi viri. nam sic habeto, beneficiorum magnitudine eos, qui temporibus valuerunt ut vale[a]nt, coniunctiores tecum esse quam me, necessitudine neminem. quam ob rem grata mihi est et memoria tua nostrae coniunctionis et eius etiam augendae voluntas.