monumenta.ch > Cicero > Epistula 35 > Epistula 3 > Epistula 16 > Epistula 22 > Epistula 3 > Epistula 15 > Epistula 25 > Epistula 13 > Epistula 18 > Epistula 39 > Epistula 14 > Epistula 11 > Epistula 10 > Epistula 11 > Epistula 16 > Epistula 48 > Epistula 15 > Epistula 27 > Epistula 41 > Epistula 37a > Epistula 16 > Epistula 16 > Epistula 17 > Epistula 12 > Epistula 27 > Epistula 13 > Epistula 23 > Epistula 14 > Epistula 20 > Epistula 17 > Epistula 17 > Epistula 13 > Epistula 44 > Epistula 23 > Epistula 18 > Epistula 14 > Epistula 12 > Epistula 20 > Epistula 20 > Epistula 24 > Epistula 13 > Epistula 24 > Epistula 18 > Epistula 18 > Epistula 13 > Epistula 14 > Epistula 14 > Epistula 12 > Epistula 10 > Epistula 32 > Epistula 11 > Epistula 33 > Epistula 15 > Epistula 16 > Epistula 9b > Epistula 6 > Epistula 17a > Epistula 19 > Epistula 12 > Epistula 12 > Epistula 10 > Epistula 7b
Cicero, Epistulae, Ad Atticum, Liber 9, Epistula 7 <<< >>> Epistula 8
Cicero, Ad Atticum, 9, Epistula 7b
0 Scr. Romae vi aut v Id. Mart a. 705 (49). BALBVS ET OPPIUS S. D. M. CICERONI.1 nedum hominum humilium, ut nos sumus, sed etiam amplissimorum virorum consilia ex eventu, non ex voluntate a plerisque probari solent. tamen freti tua humanitate quod verissimum nobis videbitur de eo quod ad nos scripsisti tibi consilium dabimus. quod si non fuerit prudens, at certe ab optima fide et optimo animo proficiscetur. nos si id quod nostro iudicio Caesarem facere oportere existimamus, ut, simul Romam venerit, agat de reconciliatione gratiae suae et Pompei, id eum facturum ex ipso cognovissemus, te hortari non desineremus ut velles iis rebus interesse, quo facilius et maiore cum dignitate per te qui utrique es coniunctus res tota confieret, aut si ex contrario putaremus Caesarem id non facturum et etiam velle cum Pompeio bellum gerere sciremus, numquam tibi suaderemus contra hominem optime de te meritum arma ferres, sicuti te semper oravimus ne contra Caesarem pugnares. 2 sed cum etiam nunc quid facturus Caesar sit magis opinari quam scire possimus, non possumus nisi hoc, non videri eam tuam esse dignitatem neque fidem omnibus cognitam ut contra alterutrum, cum utrique sis maxime necessarius, arma feras, et hoc non dubitamus quin Caesar pro sua humanitate maxime sit probaturus. nos tamen, si tibi videbitur, ad Caesarem scribemus ut nos certiores faciat quid de hac re acturus sit. a quo si erit nobis rescriptum, statim quae sentiemus ad te scribemus et tibi fidem faciemus nos ea suadere quae nobis videntur tuae dignitati, non Caesaris actioni esse utilissima, et hoc Caesarem pro indulgentia in suos probaturum putamus.
Cicero HOME