monumenta.ch > Cicero > 12 > Epistula 16b > Epistula 25 > Epistula 43 > Epistula 23 > Epistula 13b > Epistula 16d > Epistula 10 > Epistula 26 > Epistula 22 > Epistula 21 > Epistula 23 > Epistula 16 > Epistula 21 > Epistula 24 > Epistula 19 > Epistula 17 > Epistula 22 > Epistula 13 > Epistula 16f > Epistula 19 > Epistula 11 > Epistula 17 > Epistula 13a > Epistula 13 > Epistula 18 > Epistula 11 > Epistula 21 > Epistula 16a > Epistula 18 > Epistula 37 > Epistula 30 > Epistula 24 > Epistula 52 > Epistula 13
Cicero, Epistulae, Ad Atticum, Liber 8, Epistula 12d <<<     >>> Epistula 14

Cicero, Ad Atticum, 8, Epistula 13

0 Scr. in Formiano K. Mart. a. 705 (49). CICERO ATTICO SAL.1 lippitudinis meae signum tibi sit librari manus et eadem causa brevitatis; etsi nunc quidem quod scriberem nihil erat. omnis exspectatio nostra erat in nuntiis Brundisinis si nactus hic esset Gnaeum nostrum, spes dubia pacis, sin ille ante tramisisset, exitiosi belli metus. sed videsne in quem hominem inciderit res publica, quam acutum, quam vigilantem, quam paratum? si me hercule neminem occiderit nec cuiquam quicquam ademerit, ab iis qui eum maxime timuerant maxime diligetur. 2 multum mecum municipales homines loquuntur, multum rusticani; nihil prorsus aliud curant nisi agros, nisi villulas, nisi nummulos suos. et vide quam conversa res sit; illum quo antea confidebant metuunt, hunc amant quem timebant. id quantis nostris peccatis vitiisque evenerit non possum sine molestia cogitare. quae autem impendere putarem, scripseram ad te et iam tuas litteras exspectabam.Cicero HOME