Cicero, Epistulae, Ad Atticum, Liber 07, Epistula 6

monumenta.ch > Cicero > Epistula 19 > Epistula 16 > Epistula 8 > Epistula 7 > Epistula 26 > Epistula 9 > Epistula 13 > Epistula 17 > Epistula 22 > Epistula 15 > Epistula 3 > Epistula 21 > Epistula 6
Cicero, Epistulae, Ad Atticum, Liber 7, Epistula 5 <<< >>> Epistula 7

Cicero, Ad Atticum, 7, Epistula 6

0 Scr. in Formiano xiv K. Ian. a. 704 (50). CICERO ATTICO SAL.1 plane deest quod ad te scribam; nota omnia tibi sunt, nec ipse habeo a te quod exspectem. tantum igitur nostrum illud sollemne servemus ut ne quem istuc euntem sine litteris dimittamus. 2 de re publica valde timeo nec adhuc fere inveni qui non concedendum putaret Caesari quod postularet potius quam depugnandum. est illa quidem impudens postulatio, opinione valentior cur autem nunc primum ei resistamus? οὐ γαρ δὴ τόδε μεῖζον ἔπι κακόν quam cum quinquennium prorogabamus aut cum ut absentis ratio haberetur ferebamus, nisi forte haec illi tum arma dedimus ut nunc cum bene parato pugnaremus. dices, 'quid tu igitur sensurus es?' non idem quod dicturus; sentiam enim omnia facienda ne armis decertetur dicam idem quod Pompeius neque id faciam humili animo. sed rursus hoc permagnum rei publicae malum est et quodam modo mihi praeter ceteros non rectum me in tantis rebus a Pompeio dissidere.

Cicero HOME