Cicero, Epistulae, Ad Atticum, Liber 04, Epistula 7

monumenta.ch > Cicero > Epistula 25 > Epistula 9 > Epistula 40 > Epistula 20 > Epistula 12 > Epistula 3 > Epistula 1 > Epistula 18 > Epistula 47 > Epistula 15 > Epistula 18 > Epistula 2 > Epistula 3 > Epistula 48 > Epistula 10 > Epistula 17 > Epistula 13 > Epistula 12 > Epistula 31 > Epistula 4 > Epistula 2 > Epistula 9 > Epistula 36 > Epistula 7
Cicero, Epistulae, Ad Atticum, Liber 4, Epistula 6 <<< >>> Epistula 8

Cicero, Ad Atticum, 4, Epistula 7

0 Scr. in Arpinati m. Apr. aut Mai. a. 698 (56). CICERO ATTICO SAL.1 nihil εὐκαιρότερον epistula tua quae me sollicitum de Quinto nostro, puero optimo, valde levavit. venerat horis duabus ante Chaerippus, mera monstra nuntiarat. de Apollonio quod scribis, qui illi di irati! homini Graeco qui conturbat atque idem putat sibi licere quod equitibus Romanis. nam Terentius suo iure. 2 de Metello οὐχ ὁσίη φθιμένοισιν, sed tamen multis annis civis nemo erat mortuus qui quidem . . . tibi nummi meo periculo sint. quid enim vereris? quemcumque heredem fecit, nisi Publium fecit, virum fecit, non improbe, quamquam fuit ipse. qua re in hoc thecam nummariam non retexeris, in aliis eris cautior. 3 mea mandata de domo curabis, praesidia locabis, Milonem admonebis. Arpinatium fremitus est incredibilis de Laterio. quid quaeris? equidem dolui; ὁ δὲ οὐκ ἐμπάζετο μύθων quod superest, etiam puerum Ciceronem curabis et amabis, ut facis.