Catullus, Carmina, LXIII.
| 1 | Super alta vectus Attis celeri rate maria, |
| 2 | Phrygium ut nemus citato cupide pede tetigit, |
| 3 | adiitque opaca silvis redimita loca deae, |
| 4 | stimulatus ibi furenti rabie, vagus animis, |
| 5 | devolsit ili acuto sibi pondera silice, |
| 6 | itaque ut relicta sensit sibi membra sine viro, |
| 7 | etiam recente terrae sola sanguine maculans, |
| 8 | niveis citata cepit manibus leve typanum, |
| 9 | typanum tuum, Cybebe, tua, mater initia, |
| 10 | quatiensque terga tauri teneris cava digitis |
| 11 | canere haec suis adorta est tremebunda comitibus. |
| 12 | 'agite ite ad alta, Gallae, Cybeles nemora simul, |
| 13 | simul ite, Dindymenae dominae vaga pecora, |
| 14 | aliena quae petentes velut exules loca |
| 15 | sectam meam exsecutae duce me mihi comites |
| 16 | rapidum salum tulistis truculentaque pelagi |
| 17 | et corpus evirastis Veneris nimio odio; |
| 18 | hilarate erae citatis erroribus animum. |
| 19 | mora tarda mente cedat: simul ite, sequimini |
| 20 | Phrygiam ad domum Cybebes, Phrygia ad nemora deae, |
| 21 | ubi cymbalum sonat vox, ubi tympana reboant, |
| 22 | tibicen ubi canit Phryx curvo grave calamo, |
| 23 | ubi capita Maenades vi iaciunt hederigerae, |
| 24 | ubi sacra sancta acutis ululatibus agitant, |
| 25 | ubi suevit illa divae volitare vaga cohors, |
| 26 | quo nos decet citatis celerare tripudiis.' |
| 27 | simul haec comitibus Attis cecinit notha mulier, |
| 28 | thiasus repente linguis trepidantibus ululat, |
| 29 | leve tympanum remugit, cava cymbala recrepant. |
| 30 | viridem citus adit Idam properante pede chorus. |
| 31 | furibunda simul anhelans vaga vadit animam agens |
| 32 | comitata tympano Attis per opaca nemora dux, |
| 33 | veluti iuvenca vitans onus indomita iugi; |
| 34 | rapidae ducem sequuntur Gallae properipedem. |
| 35 | itaque, ut domum Cybebes tetigere lassulae, |
| 36 | nimio e labore somnum capiunt sine Cerere. |
| 37 | piger his labante languore oculos sopor operit; |
| 38 | abit in quiete molli rabidus furor animi. |
| 39 | sed ubi oris aurei Sol radiantibus oculis |
| 40 | lustravit aethera album, sola dura, mare ferum, |
| 41 | pepulitque noctis umbras vegetis sonipedibus, |
| 42 | ibi Somnus excitam Attin fugiens citus abiit; |
| 43 | trepidante eum recepit dea Pasithea sinu. |
| 44 | ita de quiete molli rapida sine rabie |
| 45 | simul ipsa pectore Attis sua facta recoluit, |
| 46 | liquidaque mente vidit sine quis ubique foret, |
| 47 | animo aestuante rusum reditum ad vada tetulit. |
| 48 | ibi maria vasta visens lacrimantibus oculis, |
| 49 | patriam allocuta maestast ita voce miseriter. |
| 50 | 'patria o mei creatrix, patria o mea genetrix, |
| 51 | ego quam miser relinquens, dominos ut erifugae |
| 52 | famuli solent, ad Idae tetuli nemora pedem, |
| 53 | ut aput nivem et ferarum gelida stabula forem, |
| 54 | et earum omnia adirem furibunda latibula, |
| 55 | ubinam aut quibus locis te positam, patria, reor? |
| 56 | cupit ipsa pupula ad te sibi derigere aciem, |
| 57 | rabie fera carens dum breve tempus animus est. |
| 58 | egone a mea remota haec ferar in nemora domo? |
| 59 | patria, bonis, amicis, genitoribus abero? |
| 60 | abero foro, palaestra, stadio et gyminasiis? |
| 61 | miser a miser, querendum est etiam atque etiam, anime. |
| 62 | quod enim genus figurast, ego non quod obierim? |
| 63 | ego mulier, ego adulescens, ego ephebus, ego puer, |
| 64 | ego gymnasi fui flos, ego eram decus olei: |
| 65 | mihi ianuae frequentes, mihi limina tepida, |
| 66 | mihi floridis corollis redimita domus erat, |
| 67 | linquendum ubi esset orto mihi Sole cubiculum. |
| 68 | ego nunc deum ministra et Cybeles famula ferar? |
| 69 | ego Maenas, ego mei pars, ego vir sterilis ero? |
| 70 | ego viridis algida Idae nive amicta loca colam? |
| 71 | ego vitam agam sub altis Phrygiae columinibus, |
| 72 | ubi cerva silvicultrix, ubi aper nemorivagus? |
| 73 | iam iam dolet quod egi, iam iamque paenitet.' |
| 74 | roseis ut huic labellis sonitus citus abiit |
| 75 | geminas deorum ad aures nova nuntia referens, |
| 76 | ibi iuncta iuga resolvens Cybele leonibus |
| 77 | laevumque pecoris hostem stimulans ita loquitur. |
| 78 | 'agedum,' inquit 'age ferox i> fac ut hunc furor |
| 79 | fac uti furoris ictu reditum in nemora ferat, |
| 80 | mea libere nimis qui fugere imperia cupit. |
| 81 | age caede terga cauda, tua verbera patere, |
| 82 | fac cuncta mugienti fremitu loca retonent, |
| 83 | rutilam ferox torosa cervice quate iubam.' |
| 84 | ait haec minax Cybebe religatque iuga manu. |
| 85 | ferus ipse sese adhortans rapidum incitat animo, |
| 86 | vadit, fremit, refringit virgulta pede vago. |
| 87 | at ubi umida albicantis loca litoris adiit, |
| 88 | teneramque vidit Attin prope marmora pelagi, |
| 89 | facit impetum. illa demens fugit in nemora fera; |
| 90 | ibi semper omne vitae spatium famula fuit. |
| 91 | dea, magna dea, Cybebe, dea domina Dindymi, |
| 92 | procul a mea tuos sit furor omnis, era, domo: |
| 93 | alios age incitatos, alios age rabidos. |