monumenta.ch > Cassiodorus > XIII. SENATUI URBIS ROMAE THEODAHADUS REX. (a. 535)
Cassiodorus, Variae, LIBER DECIMUS, , XII. SENATUI URBIS ROMAE THEODAHADUS REX. (a. 535) <<<     >>> XIIII. POPULO ROMANO THEODAHADUS REX. (a. 535)

Cassiodorus, Variae, LIBER DECIMUS, XIII. SENATUI URBIS ROMAE THEODAHADUS REX. (a. 535)

1 Postquam venerabiles viros episcopos agnita legatione remisimus nec petitionibus vestris, quamvis essent quaedam reprehensibilia, noster animus obviasset, venientes ad nos aliqui retulerunt civitatem Romanam adhuc inepta sollicitudine laborare et id agere, ut, nisi nostrae mansuetudinis interesset, pericula sibi potius certa ex dubiis suspicionibus concitaret.2 unde aestimate, cui debeat populorum inanis levitas imputari nisi vestro ordini, a quo decuerant cuncta componi.3 Per vestram siquidem sapientiam ammoneri provincias oportuit universas, ut talia probarentur assumere, quae principis primordia viderentur ornare.4 verum quae civitas non fiat excusabilis, si Roma deliquerit? res minor ad potioris currit exemplum et alieni facti iure invidiam sustinet, quae peccatis praestat exemplum.5 sed gratias divinitati referimus, quae dona sua vestris potius ornavit excessibus.6 Ecce prius culpas ignoscimus quam devotiones aliquas sentiamus.7 nil debemus et solvimus: ante benefici sumus, ut postea gratissimos invenire possimus.8 sed licet in hac parte nostrae modestiae gravitas asseratur, nolumus tamen nos tantum praedicari, nisi ut et devotionis Romanae benignitas possit ostendi.9 plus enim vestra opinione pascimur, quam si de nostra semper tranquillitate laudemur.10 Amovete suspiciones ab ordine vestro semper extraneas.11 non decet senatum corrigi, qui debet alios paterna exhortatione moderari.12 nam ex quibus habebunt genium mores, si parentes publicos minores contigerit inveniri? sufficiunt haec nobilibus, sufficiunt ista verecundis, ut ad studium perfectae devotionis incitemus quos paululum de prava suspicione culpavimus.13 nos enim quod praesentiam vestram expetivimus, non vexationis iniuriam, sed utilitatis vestrae causas profunda cogitatione tractavimus, ut illud magis debuissetis efficere, quod vobis cognovimus expedire.14 Certe munus est videre principem.15 hoc a vobis pro rei publicae utilitate volumus fieri, quod praemiis solebat optari.16 sed ne ipsa remedia in aliqua parte viderentur austera, cum res poposcerit aliquos ad nos praecipimus evocari, ut nec Roma suis civibus enudetur et nostra consilia viris prudentibus adiuventur.17 Redite ergo in pristinam devotionem et sollicitudines meae, quas pro generalitate sustineo, vestro potius adiuventur ingenio, quia hoc vobis semper insitum fuit principibus vestris votum puritatis offerre nec parere necessitate terroris, sed potius amore dominantis.18 reliqua per harum portitorem illum verbo dicenda commisimus, ut summotis cogitationibus ambiguis nostris ammonitionibus credere debeatis.Cassiodorus HOME