Cassiodorus, Praefatio, CAPUT XII. Utrum in quinque voluminibus Psalmorum sit secanda contextio, an certe unus liber debeat nuncupari.
| 1 | Beatus Hieronymus prophetiam Psalmorum in quinque libros putavit esse dividendam (Praefat. in psal. ad Sophron.), quia in textu operis huius quarto legitur, fiat, fiat; dum hoc verbo intercedente, nonnulla se videatur aperire divisio. |
| 2 | Huic favet assensa posteritas. |
| 3 | Credo dum sibi consultum iudicavit, quod in multas partes coarctabatur taediosa longinquitas. |
| 4 | Hilarius autem, Pictaviensis episcopus, divinarum rerum acutissimus et profundissimus exquisitor, congruentius librum aestimat (Prolog. in Psal.) dici debere Psalmorum: quia in Hebraeo unum volumen est; et maxime cum in Actibus Apostolorum (Cap. I, 20) legatur dictum: In libro Psalmorum. |
| 5 | Quapropter merito unus liber dicitur, qui tanta auctoritate firmatur. |