Cassiodorus, 6, CAPUT II.Quomodo Iulianus ad ritum devenerit paganorum, et de sacrificiis idolorum.
| 1 | Fertur itaque mox in ipso principio Iulianum sic aperte et impudenter negasse Christianam fidem, ut quibusdam sacrificiis et invocationibus, quas expiationes [ed., expeditiones] pagani vocant, et sanguinis immolatione, nostrum baptisma studeret ablui, et abrenuntiare ecclesiasticae confessioni. Ex illo enim tempore tam secrete quam publice, et in templis licenter pagani sacrificia celebrabant. |
| 2 | Fertur etiam quia dum aliquando sacrificaret, ostensum sit ei in visceribus pecudis immolatae signaculum crucis corona circumdatum. Qua visione, alios quidem sacrificii ministros fuisse perterritos: aestimantes quippe huiusmodi religionis virtutem et Christiani dogmatis aeternitatem; eo quod corona quae circumdabat crucem victoriae esset indicium; et quia ambitus circuli a suo principio nusquam terminaretur, sed magis rursus reverteretur in semetipsum. |
| 3 | Cumque caeteri mirarentur, princeps huius scientiae confortavit eos: dicens prospera et utilia sibi indicia fuisse monstrata; et quia magis signum dogmatis Christiani coerceretur; nec ei quo vellet dilatari liceret, termino circuli circumsepto. [SOZOMEN., lib. V, cap. 2, p. 599.] |