monumenta.ch > Cassianus > 31
Cassianus, De coenobiorum institutis, 12, XXX. Tepefactus quis per superbiam aliis quoque praeesse desiderat. <<<     >>> XXXII. Quomodo depopulatrix omnium virtutum superbia per veram humilitatem possit exstingui.

Cassianus, De coenobiorum institutis, 12, CAPUT XXXI. Quomodo superbiam vincere vel ad perfectionem pervenire possimus.

1	Quamobrem si aedificii nostri fastigia perfecta volumus ac placentia Deo consurgere, fundamenta eius non secundum nostrae libidinis voluntatem, sed secundum districtionis Evangelicae disciplinam iacere festinemus: quae alia esse non possunt, quam timor Dei atque humilitas, quae de mansuetudine et cordis simplicitate descendit.
2	Humilitas vero nullatenus poterit absque nuditate conquiri.
3	Qua peregrinante, nec obedientiae bonum, nec patientiae robur, nec mansuetudinis tranquillitas, nec consummatio charitatis ullatenus poterit apprehendi; sine quibus cor nostrum habitaculum Spiritus sancti penitus esse non poterit, ita pronuntiante Domino per prophetam (Isaiae LXVI), Super quem requiescet Spiritus meus, nisi super humilem, et quietum, et trementem verba mea? sive secundum exemplaria quae Hebraicam exprimunt veritatem: ad quem respiciam, nisi ad pauperculum, et contritum spiritu, et trementem verba mea?

Cassianus HOME
bav559.240 bnf2129.248 bnf12292.337
© 2006 - 2025 Monumenta Informatik