| 1 | Cuius moderaminis [Al. moderationis] causam nonnulli in quibusdam Occidentalibus civitatibus ignorantes, et maxime in Urbe, idcirco putant absolutionem sabbati [Al. ieiunii] minime debere praesumi, quod apostolum Petrum eodem die contra Simonem conflictaturum asserant ieiunasse (Act. VIII). |
| 2 | Ex quo magis apparet hoc eum non consuetudine canonica fecisse, sed praesentis potius necessitate conflictus. |
| 3 | Siquidem et ibi pro hac eadem re non generale, sed speciale videtur Petrus discipulis suis ieiunium indixisse; quod utique non fecisset si scisset illud canonica consuetudine solere servari: idem proculdubio etiam dominico die paratus indicere, si certaminis ipsius in eum compegisset occasio, nec tamen ex hoc statim canonica fuisset ieiunii regula promulganda: quod non generalis observatio statuerat, sed ut semel fieret, ratio necessitatis extorserat. |