Cassianus, Collationes, 1, 09, 25

monumenta.ch > Cassianus > 25
Cassianus, Collationes, 1, 9, XXIV. Quod non debeant alia postulari, quam haec tantum, quae orationis Dominicae modulo continentur. <<< >>> XXVI. Orationis spiritum variis modis ad fervorem excitari.

Cassianus, Collationes, 1, 9, CAPUT XXV. De qualitate sublimioris orationis.

Haec igitur oratio licet omnem videatur perfectionis plenitudinem continere, utpote [Ita et superius dixit (Cap. 17): Has quatuor supplicationum species etiam Dominus exemplo suo nobis initiare dignatus est. Porro initiare plerumque significat sacris imbuere, inaugurare. Unde initiatus, id est, sacris imbutus. Et Ambrosii liber De his qui initiantur mysteriis (Tom. IV). Alias vero, ut hic, initiare est inchoare, instituere, auspicari. Sidonius lib. II epist. 3 gratiae initiatae, id est, incoeptae vel inchoatae. Iulius Firmicus lib. II cap. 5 Mathes.: Ver initiatur, cum primam Arietis partem sol fuerit ingressus.] quae ipsius Domini auctoritate vel initiata sit vel statuta, provehit tamen domesticos suos ad illum praecelsiorem quem superius commemoravimus statum, eosque ad illam igneam ac perpaucis cognitam vel expertam, immo (ut proprius dixerim) ineffabilem orationem gradu eminentiore perducit, quae omnem transcendens humanum sensum, nullo non dicam sono vocis, nec linguae motu, nec ulla verborum pronuntiatione distinguitur, sed quam mens infusione coelestis illius luminis illustrata, non humanis atque angustis designat eloquiis, sed conglobatis sensibus velut de fonte quodam copiosissimo effundit ubertim, atque ineffabiliter eructat ad Dominum, tanta promens in illo brevissimo temporis puncto, quanta nec eloqui facile, nec mens percurrere in semetipsam reversa praevaleat.

Quem statum Dominus quoque inter illarum supplicationum formulas, quas vel solus in monte sedens (Lucae XXII), vel tacite fudisse describitur, similiter figuravit, cum in orationis agonia constitutus etiam guttas sanguinis inimitabili intentionis profudit exemplo.