Cassianus, Collationes, 1, 06, 12

monumenta.ch > Cassianus > 9 > 12
Cassianus, Collationes, 1, 6, XI. De duplici genere tentationum, quae triplici modo inferuntur. <<< >>> XIII. Interrogatio, si possit mens in una atque eadem qualitate iugiter durare.

Cassianus, Collationes, 1, 6, CAPUT XII. Quomodo vir iustus non cerae, sed adamantino signatorio debeat esse consimilis.

Itaque mens viri iusti non debet esse similis cerae, vel alterius cuiusquam materiae mollioris, quae semper characteri signantium cedens pro eius forma atque imagine figuratur, quamque in se tamdiu retinet, donec alio rursus impresso signaculo reformetur, atque ita fiet ut, numquam in sua qualitate persistens, ad formam eorum quae imprimuntur semper convertatur ac transeat: quin potius debet velut quoddam esse [Hoc est, sigillum ex adamante lapide, cuius durities, teste Plinio (Lib. XVII Hist. nat. cap. 4), tanta est, ut nec ferro cedat, nec igni, nec umquam incalescat. Unde proverbium natum, quo quidquid durum, indomitum, inexpugnabile, adamantinum vocamus. Hinc Origenes Adamantius dictus ob infatigabilem in scribendo legendoque naturam, cognomento ab invicibili adamantis lapidis vi imposito (D. Hieron. epist. 18).] adamantinum signatorium, ut inviolabilem mens nostra figuram sui semper custodiens characteris, universa quae incurrerint sibi ad qualitatem sui status signet atque transformet; ipsa vero insigniri nullis incursibus possit.