Cassianus, Collationes, 1, 05, 22

monumenta.ch > Cassianus > 22
Cassianus, Collationes, 1, 5, XXI. De perseverantia gastrimargiae adversus philosophos disputata. <<< >>> XXIII. Quomodo utile nobis sit vitiorum terras possidere.

Cassianus, Collationes, 1, 5, CAPUT XXII. Cur Abrahae praedixerit Deus decem gentes expugnandas a populo Israel.

Cum ad Abraham Dominus de futuris loqueretur, quod vos minime requisistis, non [Nempe Cinaeos, Cenezaeos, Cethumaeos, Hethaeos, Pheresaeos, Raphaim, Amorrhaeos, Chananaeos, Gergesaeos et Iebusaeos. Ex his decem gentibus et populis, quorum terras promisit Deus se daturum semini Abrahae, nonnisi septem memorantur et promittuntur Iudaeis Exodi III et Deuter. VII. Tres enim reliquae aliis cesserunt in haereditatem. Nam una fuit portio Esau, qui fuit nepos Abrahae, a quo Idumaei; et duae reliquae portiones filiorum Amon et Moab, qui fuere filii Loth nepotis Abrahae, quibus etiam in gratiam Abrahae duas illas gentes tradidit Deus sibi subiiciendas, et terras earum possidendas (Abulensis in cap. VII Deut. q. 1). Unde etiam Exodi II prohibiti sunt filii Israel pugnare adversus Idumaeos, Ammonitas et Moabitas.] septem gentes legitur dinumerasse, sed decem, quarum terra semini eius danda promittitur [Genes. XV]. [Huic loco subobscuro lucem attulit Dionysius hac sua paraphrasi: Qui denarius numerus (scilicet vitiorum, per decem illas gentes moraliter designatus) evidenter impletur, cum idololatria blasphemiaque adduntur (nempe octo vitiis principalibus sive capitalibus, de quibus in hac collat. agitur). Quibus duobus peccatis subiecta fuit impia gentilium multitudo, et blasphema Iudaeorum caterva, in spiritali Aegypto, id est, in hoc saeculo nequam, conversans, ante notitiam Dei gratiamque baptismi. Ita Dionysius, ubi intellectualem, sive spiritualem Aegyptum interpretatur praesens saeculum nequam; at videtur potius gastrimargiae seu gulae vitium ex praecedenti gentium tropologia intelligendum.] Qui numerus adiecta idololatria atque blasphemia evidenter impletur, quibus ante notitiam Dei et gratiam baptismi vel impia gentilium, vel blasphema Iudaeorum multitudo subiecta est, donec in intellectuali Aegypto commoratur.

Si autem abrenuntians quis et egressus exinde per Dei gratiam, devicta pariter gastrimargia, [Id est, ad virtutum studium, vel spiritualem animae statum et quietem, victor scilicet gulae effectus, evaserit, quae per Aegyptiam gentem designatur.] ad eremum pervenerit spiritalem, de impugnatione trium gentium liberatus, contra septem tantum, quae per Moysen dinumerantur, bella suscipiet.