Cassianus, Collationes, 1, 04, 10

monumenta.ch > Cassianus > 10
Cassianus, Collationes, 1, 4, IX. Responsio de intellectu recte interrogantis. <<< >>> XI. Quid in hoc loco caro ab Apostolo nominetur, et quid sit concupiscentia carnis.

Cassianus, Collationes, 1, 4, CAPUT X. Quod vocabulum carnis non in una significatione ponatur.

1	[Isidorus Pelusiotes (Lib. IV) Cassiani nostri coaetaneus et condiscipulus in quadam epistola (Epist. 477) duas tantum designat carnis acceptiones, sub quibus tamen reliquae fere continentur: Carnis, inquit, vocabulum bifariam in Scripturis usurpatur. quandoque enim de natura intelligitur, quandoque autem de affectu et labe. Prioris significationis exemplum hoc est: Spiritus carnem et ossa non habet, sicut me videtis habere (Luc. XXIV). Posterioris: Caro et sanguis regnum Dei haereditate possidere non possunt. Ita ille. At plenior et accuratior est divisio ac distinctio quae hic habetur.] Vocabulum carnis in Scripturis sanctis multifarie legimus nominari: nam nonnumquam significat hominem integrum, id est, qui ex corpore constat et anima; ut ubi [Ioan. I]: Et verbum caro factum est; et (Isaiae XL et Lucae III): Videbit omnis caro salutare Dei nostri. Nonnumquam homines peccatores atque carnales; ut ibi [Genes. VI]: Non permanebit spiritus meus in hominibus istis, eo quod sint caro.
2	Interdum pro ipsis peccatis ponitur; ut ibi [Rom. VIII]: Vos autem non estis in carne, sed in spiritu. Et iterum [I Cor. XV]: Caro et sanguis regnum Dei non possidebunt. Denique sequitur: Neque corruptio incorruptelam possidebit. Nonnumquam pro cognatione et propinquitate; ut ibi [II Reg. V]: Ecce nos os tuum, et caro tua sumus. Et Apostolus [Rom. XI]: Si quomodo in aemulationem inducam carnem meam, et salvos faciam aliquos ex illis.
3	Quaerendum ergo nobis est, secundum quam significationem ex his quatuor, carnem hic debeamus accipere. Manifestum namque est secundum illud quod positum est, Et verbum caro factum est; vel illud, Et videbit omnis caro salutare Dei, penitus stare non posse; sed neque secundum illud quod dicitur, Non permanebit spiritus meus in hominibus istis, eo quod sunt caro; quia non, sicut ibi abrupte de homine peccatore, ita et hic ponitur caro, cum dicitur [Gal. IV]: Caro concupiscit adversus spiritum, et spiritus adversus carnem.
4	Neque enim de rebus substantialibus loquitur, sed actualibus, quae in uno eodemque homine vel pariter vel sigillatim cum quadam temporis vicissitudine et mutatione luctantur.