monumenta.ch > Boethius > De oxygonio rubrica.
Boethius, Euclides Megarensis Geometria, 2, De amblygonio rubrica. <<< >>> De parte altera longiori rubrica.
Boethius, Euclides Megarensis Geometria, 2, De oxygonio rubrica.
1 Restat ut dicamus de oxygonii speculatione, qui sextus in trigonorum descriptione ab Euclide non segni geometra ponitur acuti angulus determinatus.2 Esto igitur oxygonius, cuius minoris lateris terminus, id est minor hypothemisa 13 pedibus terminetur, maior autem 15 et basis 14 mensuretur, cuius catheci et embadi summa si ignoratur, tali ratione colligetur.3 Ducatur ergo lateris minoris quantitas per se, 169 redundat; basis item terminus si per se excreverit, 196 nascentur; quas videlicet summas si iunxeris, 365 efficies.4 Quo facto multiplicetur etiam terminus hypothemisalis per se, et exsurget 225 numerus; quem si de superius copulata summa secrevero, fiunt residui 140; horum medietas 70 esse pernotatur, quod per basim dispersum quinquies ipsam in se retinet.5 Dominationis vero huius summam minor obtinet praecisura, quae per se adaucta 25 constituit.6 Hos si de minoris lateris summa per se multiplicata abstuleris, 144 supersunt, quorum tetragonale latus, quod 12 est, catheci summam explebit.7 Areae conclusionem hoc modo investigare curato, basis medium ducito per cathecum, id est 7 per 12, et provenient 84. Hanc summam complere areale huius trigoni pavimentum non ignora, describatur ergo huiusmodi de hoc figura.8 Sed quia de trigonorum podismali consideratione in superioribus diligentium lectorum indagini explanavimus, superest ut ad tetragonorum speculationem transitum faciamus succinctum, de his habituri tractatum.9 Quadratorum enim caeteris facilior est collectio, et prius quidem de normali tetragono tali modo ordiamur.10 Omnis igitur tetragonus normaliter constitutus latitudinem longitudine multiplicante arealem constituit planitudinem, et podismum sine dubio absolvit.11 Ponatur modo tetragonus pari numero consignatus, id est 8, quos per se latitudinem per longitudinem multiplicans, 64 efficiam, embadum videlicet subtus descripti tetragoni.12 Idem vero si per imparem numerum feceris, attente obstaculo eadem ratio constabit, qui normalis tetragonus ab Euclide aequilaterus atque rectiangulus nominatur, a Nicomacho autem in arithmeticis similiter appellatur.
Boethius HOME