monumenta.ch > Boethius > 21
Boethius, De Arithmetica, 2, XX. De numeris solidis. <<<     >>> XXII. De his pyramidis quae a quadratis vel a caeteris multiangulis figuris proficiscuntur.

Boethius, De Arithmetica, 2, CAPUT XXI. De pyramide, quod ea sit solidarum figurarum principium, sicut triangulus planarum, et de speciebus.

1 Videtur autem quemadmodum in planis figuris triangulus numerus primus est, sic in solidis qui vocatur pyramis profunditatis esse principium. Omnium quippe ratarum in numeris figurarum necesse est invenire primordia. Est autem pyramis alias a triangula basi in altitudinem sese erigens, alias a tetragona, alias a pentagona, et secundum sequentium multitudines angulorum ad unum cacuminis verticem sublevata.2 Posito enim triangulo atque disposito, si per tres angulos singulae rectae lineae stantes ponantur, haeque tres inclinentur ut ad unum medium punctum vertices iungant, fit pyramis. Quae cum a triangula basi profecta sit, tribus triangulis per latera concluditur hoc modo: Sit a, b, c, triangulum, si huic igitur triangulo per tres angulos erigantur lineae, et ad unum punctum convertantur, quod est d, ita ut d punctum non sit in plano sed pendens, illae scilicet lineae ad ipsum erectae verticem, et quodammodo cacumen d facient, et erit basis a, b, c, unum triangulum, per latera vero, tria triangula, id est unum triangulum a, d, b, aliud vero b, d, c, tertium vero c, d, a. Boethius HOME
bnf1614.52 bnf6639.122 bnf11241.50 bnf11242.57 bsb46504.178 cec83.86 cec185.109 cec186.82 csg248.31 sbe358.97 vad296.29r
© 2006 - 2025 Monumenta Informatik