Benedictus Nursianus, Regula Benedicti, 54

monumenta.ch > Ioannes Saresberiensis > 1 > 25 > 58 > 16 > 13 > 4 > 39 > 2 > 12 > 70 > 62 > 6 > 47 > 31 > 42 > 26 > 22 > 19 > 10 > 54
Benedictus Nursianus, Regula Benedicti no ed. text, LIII De hospitibus suscipiendis no ed. text <<< >>> LV De Vestimentis et calceamentis Fratrum no ed. text

Benedictus Nursianus, Regula Benedicti, Caput LIV Si debeat Monachus litteras vel eulogia suscipere

1 Nullatenus liceat monacho neque a parentibus suis neque a quoquam hominum nec sibi invicem litteras, eulogias vel quaelibet munuscula accipere aut dare sine praecepto abbatis. 2 Quod si etiam a parentibus suis ei quicquam directum fuerit non praesumat suscipere illud, nisi prius indicatum fuerit abbati. 3 Quod si iusserit suscipi, in abbatis sit potestate cui illud iubeat dari, 4 et non contristetur frater cui forte directum fuerat, ut non detur occasio diabolo. 5 Qui autem aliter praesumpserit, disciplinae regulari subiaceat.