Beda Venerabilis, De Schematis et Tropis Sacrae Scripturae, 2, XIII. De homoeosi.
| 1 | Homoeosis est minus notae rei per similitudinem eius quae magis nota est demonstratio; huius species sunt tres, eicon, parabole, paradeigma. |
| 2 | De eicon. Eicon est personarum inter se, vel eorum quae personis accidunt, comparatio, ut, Ioan. I: Vidimus gloriam eius, gloriam quasi Unigeniti a patre; et, Luc. XX: Neque nubent, neque ducent uxores, neque enim ultra mori poterunt, aequales enim angelis erunt. |
| 3 | De parabole. Parabole est rerum genere dissimilium comparatio, ut, Matth. XIII: Simile est regnum coelorum grano sinapis; et, Ioan. III: Sicut Moyses exaltavit serpentem in deserto, ita exaltari oportet Filium hominis. |
| 4 | De paradeigmate. Paradeigma est praepositio, sive enarratio exempli exhortantis aut deterrentis. Exhortantis, ut, Iac. V: Elias homo erat similis nobis, passibilis, et orationem oravit ut non plueret super terram, et non pluit annis tribus, et mensibus sex; et, Matth. VI: Respicite volatilia coeli, quoniam non serunt, neque metunt, neque congregant in horrea, et pater vester coelestis pascit illa. Deterrentis, ut, Matth. XXIV: Illa hora qui fuerit in tecto, et vasa eius in domo, non descendat tollere illa; et qui in agro, similiter non redeat retro. Memores estote uxoris Loth. |
| 5 | Et sic habentur tredecim generales tropi sacrae Scripturae. |