| 1 | Qui nomen vultumque patris, Pauline, gerebas, Amissi specimen qui genitoris eras: Propter quem luctus miserae decedere matris Coeperat, offerret cum tua forma patrem: Redderet et mores, et moribus adderet illud, Paulinus caruit quo pater, eloquium. |
| 2 | Eriperis laetis, et pubescentibus annis: Crudaque adhuc matris pectora sollicitas. |
| 3 | Flemus enim raptam thalami de sede sororem, Heu! non maturo funere, Dryadiam. |
| 4 | Flemus: ego in primis, qui matris avunculus, et vos Natorum tamquam diligo progeniem. |
| 5 | Illa manus inter genitricis, et oscula patris Occidit, Hispana tum regione procul. |
| 6 | Quam tener, et primo, nove flos, decerperis aevo, Nondum purpureas cinctus ephebe genas! Quatuor ediderat nunc facta puerpera partus: Funera sed tumulis iam geminata dedit. |
| 7 | Sit satis hoc, Pauline pater, divisio facta est. |
| 8 | Debetur matri caetera progenies. |