| 1 | Qui proceres, veteremque volet celebrare Senatum, Claraque ab exortu stemmata Burdigalae, Teque, tuumque genus memoret, Lucane Talisi: Moribus ornasti qui veteres proavos. |
| 2 | Pulcher honore oris, tranquillo pectore, comis, Facundo civis maior ab ingenio. |
| 3 | Venatu, et ruris cultu, victusque nitore, Omne aevum peragens; publica despiciens. |
| 4 | Nosci inter primos cupiens, prior esse recusans. |
| 5 | Ipse tuo vivens segregus arbitrio. |
| 6 | Optabas tu me generum florente iuventa. |
| 7 | Optare hoc tantum, non et habere datum. |
| 8 | Vota probant superi: meritisque faventia sanctis Implent fata, viri quod voluere boni. |
| 9 | Et nunc perpetui sentis sub honore sepulcri, Quam reverens natae, quamque tui maneam: Caelebs namque gener nunc haec pia munera solvo. |
| 10 | Nam et caelebs numquam desinet esse gener. |