| 1 | Et patruos Elegea meos reminiscere cantu; Contentum, tellus quem Rutupina tegit. |
| 2 | Magna cui et variae quaesita pecunia sortis, Haeredis nullo nomine tuta perit. |
| 3 | Raptus enim laetis, et adhuc florentibus annis, Trans mare, et ignaris fratribus oppetiit. |
| 4 | Iulius in longam produxit fata senectam, Affectus damnis innumerabilibus. |
| 5 | Qui comis, blandusque, et mensa commodus uncta, Haeredes solo nomine nos habuit. |
| 6 | Ambo pii, vultu similes, ioca seria mixti, Aevi fortunam non habuere parem. |
| 7 | Discreti quamquam tumulis, et honore iacetis: Commune hoc verbi munus habete, Vale. |