| 1 | Aemiliam nunc fare aviam, pia cura nepotis: Coniux praedicto quae fuit Arborio. |
| 2 | Nomen huic ioculare datum: cute fusca quod olim, Aequales inter Maura vocata fuit. |
| 3 | Sed non atra animo qui clarior esset olore, Et non calcata qui nive candidior. |
| 4 | Haec non deliciis ignoscere prompta pudendis, Ad perpendiculum seque suosque habuit. |
| 5 | Haec me praereptum cunis, et ab ubere matris, Blanda sub austeris imbuit imperiis. |
| 6 | Tranquillos aviae cineres praestate quieti Aeternum Manes, si pia verba loquor. |