| 1 | Nomina charorum iam condita funere iusto, Fleta prius lacrymis, nunc memorabo modis, Nuda, sine ornatu, fandique carentia cultu. |
| 2 | Sufficit inferiis exsequialis honos. |
| 3 | Naenia funereis satis officiosa querelis, Annua ne tacitus munera praetereas: Quae Numa cognatis solemnia dedicat umbris: Ut gradus aut mortis postulat, aut generis. |
| 4 | Hoc satis et tumulis, satis et telluris egenis. |
| 5 | Voce ciere animas funeris instar habet. |
| 6 | Gaudent compositi cineres sua nomina dici. |
| 7 | Frontibus hoc scriptis et monumenta iubent. |
| 8 | Ille etiam moesti cui defuit urna sepulcri, Nomine ter dicto pene sepultus erit. |
| 9 | At tu quicumque es lector, qui fata meorum Dignaris moestis commemorare elegis, Inconcussa tuae percurras tempora vitae: Et praeter iustum funera nulla fleas. |