| 1 | Phoebe potens numeris, praeses Tritonia bellis, tu quoque ab aerio praepes Victoria lapsu, come serenatam duplici diademate frontem, serta ferens, quae dona togae, quae praemia pugnae. |
| 2 | bellandi fandique potens Augustus honorem bis meret, ut geminet titulos, qui proelia Musis temperat et Geticum moderatur Apolline Martem. |
| 3 | arma inter Chunosque truces furtoque nocentes Sauromatas, quantum cessat de tempore belli, indulget Clariis tantum inter castra Camenis. |
| 4 | vix posuit volucres stridentia tela sagittas: Musarum ad calamos fertur manus, otia nescit et commutata meditatur harundine carmen: sed carmen non molle modis, bella horrida Martis Odrysii Thraessaeque viraginis arma retractat. |
| 5 | exulta, Aeacide, celebraris vate superbo rursum Komanusque tibi contingit Homerus. |