| 1 | DYNAMIO BVRDIGALENSI QVI IN HISPANIA DOCVIT ET OBIIT. Set neque te maesta, Dynami, fraudabo querella, municipem patriae causidicumque meae, crimine adulterii quem saucia fama fugavit, parvula quem latebris fovit Ilerda suis. |
| 2 | quem locupletavit coniunx Hispana latentem: namque ibi mutato nomine rhetor eras, rhetor Flavini cognomine dissimulatus, ne posset profugum prodere culpa suum. |
| 3 | reddiderat quamvis patriae te sera voluntas, mox residem rursum traxit Ilerda domus. |
| 4 | qualiscumque tuae fuerit fuga famaque vitae, iungeris antiqua tu mihi amicitia: officiumque meum, sensus si manibus ullus, accipe iam verum morte obita, Dynami. |
| 5 | diversis quamvis iaceas defunctus in oris, commemorat maestis te pia cura elegis. |