| 1 | ALETHIO MINERVIO FILIO RHETORI. O flos iuvenum, spes laeta patris, nec certa tuae data res patriae, rhetor Alethi. |
| 2 | tu primaevis doctor in annis tempore, quo te discere adultum non turpe foret, praetextate iam genitori conlatus eras. |
| 3 | ille superbae moenia Romae fama et meritis inclitus auxit: tu Burdigalae laetus patriae postque Paterae clara cohortis vexilla regens et praeceptor maior utroque, non sine morsu gravis invidiae cuncta habuisti commoda fati, non mansuris ornate bonis. |
| 4 | omnia praecox fortuna tibi dedit et rapuit. |
| 5 | solstitialis velut herba solet. |
| 6 | ostentatus raptusque simul. |
| 7 | pubere in aevo deseruisti vota tuorum et rhetoricam floris adulti fruge carentem et conubium nobile soceris sine pace patris et divitias utriusque domus sine herede tuo. |
| 8 | quam fatiloquo dicte profatu versus Horati: nihil est ab omni parte beatum. |