| 1 | ATTVSIVS LVCANVS TALISIVS SOCER. Qui proceres veteremque volet celebrare senatum claraque ab exortu stemmata Burdigalae, teque tuumque genas memoret, Lucane Talisi, moribus ornasti qui veteres proavos. |
| 2 | pulcher honore oris, tranquillo pectore, comis, facundo quivis maior ab ingenio: venatu et ruris cultu victusque nitore omne aevum peragens, publica despiciens: nosci inter primos cupiens, prior esse recusans, ipse tuo vivens segregus arbitrio. |
| 3 | optabas tu me generum florente iuventa: optare hoc tantum, non et habere datum. |
| 4 | vota probant superi meritisque faventia sanctis inplent fata, viri quod voluere boni. |
| 5 | et nunc perpetui sentis sub honore sepulcri, quam reverens natae quamque tui maneam. |
| 6 | caelebs namque gener haec nunc pia munera solvo: nam et caelebs numquam desinam et esse gener. |