| 1 | AEMILIA CORINTHIA MAVRA AVIA. Aemiliam nunc fare aviam, pia cura nepotis, coniunx praedicto quae fuit Arborio. |
| 2 | nomen huic ioculare datum: cute fusca quod olim aequales inter Maura vocata fuit. |
| 3 | sed non atra animo, qui clarior esset olore et non calcata qui nive candidior. |
| 4 | haec non deliciis ignoscere prompta pudendis ad perpendiculum seque suosque habuit. |
| 5 | haec me praereptum cunis et ab ubere matris blanda sub austeris inbuit imperiis. |
| 6 | tranquillos aviae cineres praestate quieti aeternum manes, si pia verba loquor. |